Breaking
Article

पोखराको अन्नपूर्ण आत्मनिर्भर बालआश्रममा आगलागी, एक करोडभन्दा बढीको क्षति

2 days ago • B.S. 2083 Mangsir 03

बालआश्रमको पुनःस्थापना तथा आवश्यक व्यवस्थापनका लागि महानगरपालिकाले गर्न सक्ने सबै सहयोग उपलब्ध गराउने प्रमुख आचार्यको भनाइ

Pkr annapurna.jpg

पोखराको अन्नपूर्ण आत्मनिर्भर बालआश्रममा आगलागी हुँदा एक करोड रुपैयाँभन्दा बढीको क्षति भएको अनुमान गरिएको छ । पोखरा महानगरपालिका वडा नम्बर १६ स्थित बालआश्रममा बुधबार साँझ आगलागी भएको हो ।

आगलागीबाट बालआश्रमको भवनसहित त्यहाँ रहेका विभिन्न सामग्री जलेर नष्ट भएका छन् । आगलागीबाट भएको क्षतिको पूर्ण विवरण संकलन गर्ने काम भइरहेको छ भने बालआश्रमको पुनःस्थापनाका लागि आवश्यक पहल थालिएको जनाइएको छ ।

आगलागीबाट क्षतिग्रस्त बालआश्रमको पोखरा महानगरपालिकाका प्रमुख धनराज आचार्यले स्थलगत अवलोकन गर्नुभएको छ । अवलोकनका क्रममा उहाँले घटनाप्रति दुःख व्यक्त गर्दै विपद्को यस घडीमा महानगरपालिका बालआश्रमको साथमा रहेको बताउनुभयो ।

बालआश्रमको पुनःस्थापना तथा आवश्यक व्यवस्थापनका लागि महानगरपालिकाले गर्न सक्ने सबै सहयोग उपलब्ध गराउने प्रमुख आचार्यको भनाइ छ ।

त्यस्तै, प्रमुख प्रशासकीय अधिकृत राजन पौडेलले पनि बालआश्रमको अवस्था सामान्य बनाउन आवश्यक सहयोग र समन्वय गर्ने प्रतिबद्धता जनाउनुभयो ।

अवलोकन टोलीमा वडाध्यक्ष अमृत शर्मा तिमिल्सिनासहित अन्य जनप्रतिनिधिहरूको पनि सहभागिता रहेको थियो । टोलीले आगलागीबाट भएको क्षतिको अवस्थाबारे जानकारी लिएको छ ।