विवादित गखेप सदस्य सचिव शर्मालाई कारवाही गर्न गण्डकीका मुख्यमन्त्रीको आनाकानी

गण्डकी खेलकुद परिषद्का सदस्य सचिव श्रीधर शर्मामाथि कारबाहीको प्रक्रिया अघि बढ्न नसकेको विषय सार्वजनिक भएको छ । परिषद्मा पदक वितरणका क्रममा भएको भनिएको लापरबाही र अनियमितताबारे सामाजिक विकास, युवा तथा खेलकुद मन्त्रालयले गठन गरेको छानबिन समितिले कारबाहीका लागि सिफारिस गरेको थियो । समितिको निष्कर्षकै आधारमा प्रदेशको न्यायाधिवक्ताको कार्यालयले समेत सदस्य सचिव शर्मामाथि कारबाहीका लागि राय दिएको बताइएको छ ।  प्रतिवेदन पेस भएको डेढ महिना बितिसक्दा पनि कारबाही प्रक्रिया अघि नबढेको स्रोतको दाबी छ । विभागीय मन्त्री रेखाकुमारी गुरुङले पनि शर्मालाई राजीनामा दिन आग्रह गरेको र नमानेपछि कारबाहीका लागि सिफारिस गरिएको बताउनुभएको छ ।

यसैबीच, सदस्य सचिव शर्मा नेपाली कांग्रेसको महाधिवेशन प्रतिनिधिका रूपमा सहभागी भएको विषयसमेत विवादमा आएको छ । परिषद्को कार्यविधिले सदस्य सचिवलाई राजनीतिक दलको कार्यकारिणी पदमा बस्न तथा महाधिवेशन प्रतिनिधि बन्न रोक लगाएको बताइएको छ ।