धार्मिक भ्रमणका लागि रवि लामिछाने भारत प्रस्थान

राष्ट्रिय स्वतन्त्र पार्टी (रास्वपा) का सभापति रवि लामिछाने तीनदिने व्यक्तिगत तथा धार्मिक भ्रमणका लागि भारत प्रस्थान गर्नुभएको छ। कारागारमा रहँदा गरेको भाकल पूरा गर्न धार्मिक स्थलमा पूजाअर्चना गर्न भारत जान लागेको उहाँले बताउनुभएको हो।

शुक्रबार बिहान काठमाडौंँबाट हवाईमार्ग हुँदै धनगढी पुग्नुभएका लामिछाने पत्नी निकिता पौडेलसहित कञ्चनपुरको गड्डाचौकी नाका हुँदै भारत जानुभएको हो। धनगढी विमानस्थलमा सञ्चारकर्मीसँग कुरा गर्दै उहाँले भ्रमण पारिवारिक तथा धार्मिक उद्देश्यमा केन्द्रित रहेको बताउनुभयो।

लामिछानेका अनुसार परिवारको आध्यात्मिक आस्था र परम्पराअनुसार कारागारमा रहँदा गरिएको भाकल पूरा गर्न उहाँ भारत जान लाग्नुभएको हो। भ्रमणका क्रममा भारतको उत्तराखण्डस्थित नैनीतालमा रहेको कैंचीधाम र आसामको गुवाहाटीस्थित कामाख्या मन्दिरमा परिवारसहित पूजाअर्चना गर्ने कार्यक्रम रहेको उहाँले जानकारी दिनुभयो।

कैंचीधाम र कामाख्या मन्दिर नै रोज्नुको कारणबारे सोधिएको प्रश्नमा उहाँले ती धार्मिक स्थलमा जाने योजना पहिलेदेखि नै रहेको बताउनुभयो।

सभापति लामिछानेले भ्रमणका क्रममा कुनै राजनीतिक भेटघाटको कार्यक्रम नरहेको स्पष्ट पार्नुभयो। आफ्नो व्यक्तिगत भ्रमणलाई राजनीतिक विषयसँग नजोड्न आग्रह गर्दै उहाँले यसलाई धार्मिक आस्था र पारिवारिक विश्वाससँग सम्बन्धित विषयका रूपमा लिनुपर्ने बताउनुभयो।