चीनको सिजाङमा ७ म्याग्निच्युडको भूकम्प, १६ जनाको मृत्यु

चीनको दक्षिणपश्चिमी सिजाङ स्वायत्त क्षेत्रमा ७ म्याग्निच्युडको शक्तिशाली भूकम्प जाँदा कम्तीमा १६ जनाको मृत्यु भएको छ भने ५४ जना घाइते भएका छन्। भूकम्पका कारण ३३९ वटा घर भत्किएका छन्।

बिहीबार राति स्थानीय समयअनुसार १० बजेर ३३ मिनेटमा नाग्छु सहरको बाकेन काउन्टीमा भूकम्प गएको चीनको भूकम्प सञ्जाल केन्द्रले जनाएको छ। केन्द्रका अनुसार भूकम्प १० किलोमिटर गहिराइमा गएको थियो।

भूकम्पबाट प्रभावित क्षेत्रमा शुक्रबार बिहानैदेखि अग्नि नियन्त्रण तथा उद्धार टोली परिचालन गरिएको छ। भूकम्पको केन्द्रबिन्दु नजिकै रहेको गाङ्छे नगरमा ११० जना अग्नि नियन्त्रक, २५ वटा सवारीसाधन र खोज तथा उद्धारका लागि तालिमप्राप्त चारवटा कुकुरसहितको टोली पुगेको छ।

उद्धार टोलीले भग्नावशेषमा पुरिएका मानिसहरूको खोजी गर्नुका साथै घरहरूमा भएको क्षतिको आकलन गरिरहेको छ। थप उद्धार टोलीहरू पनि प्रभावित क्षेत्रतर्फ पठाइँदै छन्।

सिजाङको आपत्कालीन कमान्डबाट प्राप्त विवरणअनुसार शुक्रबार बिहान ७ बजेसम्म भूकम्पबाट १६ जनाको मृत्यु भएको पुष्टि भएको थियो भने ५४ जना घाइते भएका थिए। भूकम्पपछि चीनको भूकम्प प्रशासनले दोस्रो तहको आपत्कालीन प्रतिकार्य सुरु गरेको छ।

प्रभावित क्षेत्रमा खोज तथा उद्धार कार्य जारी रहेको छ।