बाँकेको अम्बे स्टिलमा आगलागी, एक करोड ५६ लाखको क्षति

बाँकेको जानकी गाउँपालिका–५, बकसपुरस्थित अम्बे स्टिल सरिया कम्पनीमा आगलागी हुँदा एक करोड ५६ लाख रुपैयाँ बराबरको क्षति भएको प्रारम्भिक विवरण प्राप्त भएको छ।

बिहीबार बिहान करिब १ः३० बजे फलाम प्रशोधनमा प्रयोग हुने फर्नेस आयल भण्डारण गरिएको ट्याङ्कीमा विद्युत् सर्ट भएर आगलागी भएको प्रारम्भिक जानकारी प्रहरीले दिएको छ।

जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतीतसिंह राठौरका अनुसार आगलागीबाट एक करोड ५६ लाख रुपैयाँ बराबरको क्षति भएको प्रारम्भिक विवरण प्राप्त भएको हो।

आगलागीको जानकारी पाएलगत्तै इलाका प्रहरी कार्यालय खजुराखुर्दबाट प्रहरी टोली घटनास्थल पुगेको थियो। नेपाल प्रहरी, स्थानीय बासिन्दा र दमकलको संयुक्त प्रयासमा करिब एक घण्टाभित्र आगो पूर्ण रूपमा नियन्त्रणमा लिइएको प्रहरीले जनाएको छ।

आगलागीको कारण र क्षतिको पूर्ण विवरणबारे थप जानकारी आउन बाँकी छ।