त्रिवेणी इन्टरनेशनल कलेजको विद्यार्थी कल्याणकारी समितिमा नयाँ नेतृत्व

त्रिवेणी इन्टरनेशनल कलेजको विद्यार्थी कल्याणकारी समिति अर्थात् एसडब्ल्यूसीको नवौँ अधिवेशन तथा दशौँ वार्षिक साधारण सभा सम्पन्न भएको छ । अधिवेशनले स्वछन्द आत्रेयको अध्यक्षतामा नयाँ कार्यसमिति गठन गरेको छ । कार्यक्रममा बीबीएस चौथो वर्षमा उत्कृष्ट नतिजा हासिल गर्ने विद्यार्थीलाई सम्मान गरिएको छ। ८१ दशमलव २० प्रतिशत अंकसहित उत्कृष्ट नतिजा ल्याउने कविता भट्टराईसहित मेधावी विद्यार्थीलाई सम्मान गरिएको हो । कार्यक्रमका वक्ताहरूले विद्यार्थीको नेतृत्व विकास, अनुशासन, सिर्जनशीलता तथा व्यावहारिक ज्ञान अभिवृद्धिमा विद्यार्थी कल्याणकारी समितिको भूमिका महत्वपूर्ण रहेको बताएका छन् । कलेज प्रमुख डिल्ली राम पौडेलले समिति कलेज र विद्यार्थीबीचको महत्वपूर्ण सेतु भएको उल्लेख गर्दै नयाँ नेतृत्वले विद्यार्थीका शैक्षिक, सिर्जनात्मक तथा सामाजिक गतिविधिलाई थप प्रभावकारी बनाउने विश्वास व्यक्त गर्नुभयो । नवनिर्वाचित अध्यक्ष स्वछन्द आत्रेयले विद्यार्थीका साझा आवश्यकता र हितलाई प्राथमिकतामा राख्दै समितिलाई सक्रिय बनाउने प्रतिबद्धता व्यक्त गर्नुभयो ।