कांग्रेस पोखरा–२७ द्वारा चाडपर्वको शुभकामना तथा बधाई कार्यक्रम सम्पन्न

नेपाली कांग्रेस पोखरा महानगरपालिका वडा नम्बर २७ को आयोजनामा चाडपर्वको शुभकामना तथा बधाई कार्यक्रम सम्पन्न भएको छ। शुक्रबार आयोजित कार्यक्रम वडा समिति सभापति नारायणमणि लामिछानेको अध्यक्षतामा सम्पन्न भएको हो।

कार्यक्रमका प्रमुख अतिथि नेपाली कांग्रेस कास्की क्षेत्र नम्बर १ का क्षेत्रीय सभापति सरोज केसीले मुलुकको समृद्धि, सुशासन र नागरिकको हितका लागि क्रियाशील हुन नेता तथा कार्यकर्तालाई आग्रह गरे। उनले पार्टीलाई जनतासँग नजिक बनाउँदै नागरिकका समस्या र आवश्यकतालाई प्राथमिकतामा राख्नुपर्ने बताए। लोकतान्त्रिक उद्योग वाणिज्य संघ गण्डकी प्रदेशका अध्यक्ष तथा महाधिवेशन प्रतिनिधि चन्द्रकृष्ण कर्माचार्यले उद्योगी तथा व्यवसायीका समस्या र आवश्यकतालाई पार्टीले गम्भीरतापूर्वक लिनुपर्नेमा जोड दिए। उनले व्यवसायीको हित संरक्षण र उनीहरूले भोगिरहेका समस्या समाधानका लागि पार्टीले पहल गर्नुपर्ने धारणा राखे। कार्यक्रममा वडा नम्बर २७ का अध्यक्ष पूर्ण गुरुङ, केन्द्रीय महाधिवेशन प्रतिनिधिहरू निरोज लामिछाने, अर्जुन भण्डारी, सोना राणा र प्रयागराज भण्डारीलगायत नेता तथा कार्यकर्ताले आ–आफ्ना धारणा राखेका थिए।

सो अवसरमा वडा समितिअन्तर्गत निर्वाचित नेता तथा कार्यकर्तालाई प्रमुख अतिथि केसीले प्रमाणपत्र वितरण गर्दै सम्मान गरेका थिए।

कार्यक्रम सञ्चालन वडासचिव विष्णु गुरुङले गरेका थिए।