दुई हजारभन्दा बढी विद्यार्थी भएका १०९ सामुदायिक विद्यालयमा पूर्वाधार विकास गरिँदै

सरकारले सामुदायिक विद्यालयप्रति विद्यार्थी र अभिभावकको आकर्षण बढाउने उद्देश्यले देशभरका ठूला सामुदायिक विद्यालयको भौतिक पूर्वाधार विकासलाई प्राथमिकता दिएको छ। दुई हजारभन्दा बढी विद्यार्थी अध्ययनरत तथा उत्कृष्ट नतिजा हासिल गर्दै आएका १०९ वटा सामुदायिक विद्यालयमा पूर्वाधार विस्तारको योजना अघि बढाइएको हो। शिक्षा तथा खेलकुद मन्त्री सस्मित पोखरेलका अनुसार चालु आर्थिक वर्षमा उक्त योजनाका लागि कुल ६ अर्ब ५४ करोड रुपैयाँ बजेट विनियोजन गरिएको छ। यस कार्यक्रममार्फत सामुदायिक विद्यालयको भौतिक संरचना सुदृढ बनाउँदै विद्यार्थीका लागि सुरक्षित र व्यवस्थित सिकाइ वातावरण तयार गर्ने लक्ष्य राखिएको छ। मन्त्री पोखरेलले दिएको जानकारीअनुसार पहिलो चरणमा ८९ वटा विद्यालयका लागि पाँच अर्ब ३४ करोड रुपैयाँ निकासा भइसकेको छ। निकासा भएको रकमबाट ती विद्यालयमा १२ कोठे, तीनतले भवन निर्माण गर्ने योजना अघि बढाइएको छ। प्रतिविद्यालय करिब छ करोड रुपैयाँ लागत अनुमान गरिएका भवनमा आधुनिक कक्षाकोठा, व्यवस्थित प्रयोगशाला र पुस्तकालयको व्यवस्था गरिने बताइएको छ। यी पूर्वाधारले विद्यार्थीको सिकाइ प्रक्रियालाई सहज, प्रभावकारी र व्यवस्थित बनाउन सहयोग पुग्ने अपेक्षा गरिएको छ। मन्त्री पोखरेलले केही सामुदायिक विद्यालयमा विद्यार्थीको चाप बढिरहेको र केही विद्यालयमा विद्यार्थी अभाव रहेको अवस्थालाई ध्यानमा राख्दै ठूला विद्यालयबाट पूर्वाधार सुधारको काम सुरु गरिएको बताएका छन्। आगामी दिनमा सबै सामुदायिक विद्यालयको शैक्षिक गुणस्तर र भौतिक पूर्वाधारमा समान सुधार ल्याउने सरकारको प्रतिबद्धता रहेको उनको भनाइ छ। उनले सामुदायिक शिक्षाको गुणस्तर सुधार गर्न शिक्षक, अभिभावक र विद्यार्थी सबैको सहकार्य आवश्यक रहेको उल्लेख गर्दै शिक्षा क्षेत्रको रूपान्तरणमा सबैलाई हातेमालो गर्न आह्वान गरेका छन्। सरकारको यो योजनाले विद्यार्थीको चाप भएका सामुदायिक विद्यालयमा पूर्वाधार व्यवस्थापनमा सहयोग पुर्‍याउने अपेक्षा गरिएको छ। यद्यपि, विद्यालयहरूबीचको शैक्षिक तथा भौतिक असमानता घटाउन पूर्वाधार निर्माणसँगै शिक्षक व्यवस्थापन, सिकाइको गुणस्तर र विद्यार्थीको समान पहुँचमा समेत ध्यान दिनुपर्ने देखिन्छ।