छथर गाउँपालिकाद्वारा ८६ विपन्न परिवारलाई दसैँका लागि खाद्यान्न सहयोग

तेह्रथुम । दसैँलाई लक्षित गर्दै तेह्रथुमको छथर गाउँपालिकाले ८६ विपन्न परिवारलाई खाद्यान्न वितरण गरेको छ। आर्थिक अभावका कारण चाडपर्वमा दैनिक उपभोग्य सामग्री जुटाउन कठिन हुने परिवारलाई राहत पुर्‍याउने उद्देश्यले गाउँपालिकाले खाद्यान्न सहयोग गरेको हो।

गाउँपालिका अध्यक्ष सन्तोष तिगेलाका अनुसार स्वीकृत कार्यक्रमअन्तर्गत कार्यविधिले तोकेको मापदण्ड पूरा गरेका परिवारलाई सम्बन्धित वडाको सिफारिसका आधारमा छनोट गरी खाद्यान्न वितरण गरिएको हो । चाडपर्वका बेला आर्थिक रूपमा कमजोर परिवारलाई खाद्यान्नको जोहो गर्न सहज बनाउने उद्देश्यले कार्यक्रम सञ्चालन गरिएको अध्यक्ष तिगेलाले बताए । खाद्यान्न सहयोग पाएपछि स्थानीय विपन्न परिवारले राहत महसुस गरेका छन्। छथर गाउँपालिका–२ का धनबहादुर लिम्बुले दसैँका लागि आवश्यक सामग्री जुटाउन कठिन भइरहेको अवस्थामा गाउँपालिकाबाट प्राप्त खाद्यान्नले परिवारलाई राहत मिलेको बताए । सोही वडाका भीमबहादुर लिम्बुले पनि आर्थिक अभावका कारण दसैँको तयारी गर्न समस्या भइरहेको बेला खाद्यान्न सहयोगले सहज भएको बताए।

छथर गाउँपालिकाले यसअघि पनि गाउँपालिकाभित्रका विपन्न परिवारलाई सहयोग गर्दै आएको जनाएको छ।