तिब्बती भाषा अध्ययनका लागि भारत लैजाँदै गरिएका २५ बालबालिकाको उद्धार

तिब्बती भाषा अध्ययनका लागि भारतको देहरादुन लैजाँदै गरिएका १० वर्षमुनिका २५ बालबालिकालाई भारतीय सीमा सुरक्षा बलले नेपाल फर्काएको छ।

हुम्लाको सिमकोट गाउँपालिका–८, सेयराका ती बालबालिकालाई पञ्चपविर बुढाले कञ्चनपुरको गड्डाचौकी नाका हुँदै भारत लैजाँदै गरेको जनाइएको छ। भारतको बनबासास्थित चेकपोस्टमा पुगेपछि भारतीय पक्षले बालबालिकालाई रोकेर नेपाल फर्काएको हो।

फर्काइएका बालबालिकालाई कञ्चनपुर प्रहरीले आफ्नो जिम्मामा लिएको छ। उनीहरू अहिले इलाका प्रहरी कार्यालय गड्डाचौकीमा रहेका छन्।

बालबालिकालाई तिब्बती भाषा अध्ययनका लागि देहरादुन लैजान लागिएको भनिए पनि कुन शैक्षिक संस्थामा भर्ना गराउने तयारी थियो भन्ने खुलेको छैन। त्यसैगरी, बालबालिकालाई भारत लैजान अभिभावकको सहमति लिइएको थियो वा थिएन भन्ने विषय पनि स्पष्ट हुन बाँकी छ।

घटनाको उद्देश्य र अन्य विवरणबारे कञ्चनपुर प्रहरीले थप अनुसन्धान गरिरहेको जनाएको छ।