एन्फा अध्यक्ष नेम्वाङसहित ४ जनाविरुद्ध मुद्दा चलाउन सीआईबीको सिफारिस

अखिल नेपाल फुटबल महासंघ, एन्फाका अध्यक्ष पंकज विक्रम नेम्वाङ र महासचिव किरण राईसहित चार जनाविरुद्ध मुद्दा चलाउन केन्द्रीय अनुसन्धान ब्युरो, सीआईबीले सिफारिस गरेको छ।

सीआईबीले अध्यक्ष नेम्वाङ, महासचिव राई, कोषाध्यक्ष रविन्द्र जोशी र लेखापाल सन्जीव पाण्डेलाई प्रतिवादी बनाउन सिफारिस गरेको हो।

अनुसन्धानमा उनीहरूले ६६ लाख ५३ हजार रुपैयाँ अनियमितता गरेको निष्कर्ष निकालिएको छ।

नेपाल र बहराइनबीचको विश्वकप छनोटका दुवै खेल घरेलु मैदानमा नखेलाई अवे मैदानमा खेलाइएको र एन्फाले पाउनुपर्ने २० हजार अमेरिकी डलर संस्थाको खातामा नआएको सीआईबीको दाबी छ।

खेलको नतिजा प्रभावित पार्न मिलेमतो भएकोसमेत अनुसन्धानबाट खुलेको सीआईबीले जनाएको छ।

कोषाध्यक्ष जोशी र लेखापाल पाण्डे पक्राउ परेका थिए भने अध्यक्ष नेम्वाङ र महासचिव राई फरार रहेको जनाइएको छ।