छोरेपाटन प्रहरी चौकी मर्मतमा सहयोग गर्नेलाई सम्मान

स्थानीय समुदायको सहयोगमा पोखरा महानगरपालिका–१७ स्थित छोरेपाटन प्रहरी चौकीको मर्मतसम्भार तथा निर्माण कार्य सम्पन्न भएको छ । मर्मतसम्भार समितिका अनुसार चौकीमा खानेपानी ट्याङ्की, शौचालय, थुनुवा कक्ष, पानी निकास, किचेन तथा भुइँमा टायल राख्नेलगायतका काम गरिएको छ । चौकी परिसरमा नवनिर्मित थुनुवा कक्षको जिल्ला प्रहरी कार्यालय कास्कीका प्रहरी उपरीक्षक नवीन कार्कीले उद्घाटन गर्नुभयो। कार्यक्रममा चौकीको निर्माण तथा मर्मतमा सहयोग गर्ने ७५ जना व्यक्ति तथा विभिन्न सङ्घसंस्थालाई सम्मान गरिएको थियो । कार्यक्रममा प्रहरी उपरीक्षक कार्कीले प्रहरी र नागरिकबीचको सहकार्य तथा विश्वास अझ सुदृढ हुन आवश्यक रहेको बताउनुभयो। सार्वजनिक संरचनाको संरक्षण तथा प्रवर्धन सबैको साझा दायित्व भएको उहाँको भनाइ थियो । समितिका अनुसार मर्मतसम्भार तथा निर्माणका लागि ९ लाख ६२ हजार १ सय ९१ रुपैयाँ आम्दानी भएकोमा ९ लाख ५८ हजार ८ सय ७० रुपैयाँ खर्च भएको छ ।