नयाँ कार्यालय, डिजिटल प्रणालीतर्फ इक्यान कास्की

नेपाल शैक्षिक परामर्श संघ अर्थात् इक्यान कास्कीको नयाँ कार्यालय उद्घाटन गरिएको छ । पोखराको सिद्धार्थ चोकमा रहेको नयाँ कार्यालयको इक्यानका केन्द्रीय अध्यक्ष लक्ष्मण पौडेल ‘एन्ड्रयु’ ले विशेष समारोहबीच उद्घाटन गर्नुभएको हो ।

शैक्षिक परामर्श क्षेत्रलाई थप व्यवस्थित, व्यावसायिक र प्रविधिमैत्री बनाउने उद्देश्यसहित नयाँ कार्यालय सञ्चालनमा ल्याइएको इक्यान कास्कीले जनाएको छ । कार्यालयसँगै संस्थाको सेवा प्रवाह, सूचना आदानप्रदान, अभिलेख व्यवस्थापन तथा आन्तरिक कार्यलाई क्रमशः डिजिटल प्रणालीमा लैजाने तयारी गरिएको छ । इक्यान कास्कीका अध्यक्ष ओमप्रकाश गैरेले नयाँ कार्यालय भौतिक संरचना परिवर्तन मात्र नभई संस्थालाई नयाँ ढंगले अघि बढाउने महत्वपूर्ण चरण भएको बताउनुभयो।उहाँले प्रविधिको प्रयोगमार्फत सदस्य संस्थाबीचको समन्वय र सेवा प्रवाहलाई थप सहज तथा प्रभावकारी बनाउने लक्ष्य रहेको उल्लेख गर्नुभयो । उद्घाटन कार्यक्रममा इक्यानका केन्द्रीय पदाधिकारी, सल्लाहकार, पूर्व तथा वर्तमान नेतृत्व, सदस्य तथा शैक्षिक परामर्श क्षेत्रका प्रतिनिधिहरूको सहभागिता रहेको थियो । नयाँ संरचना र डिजिटल रूपान्तरणको योजनासहित इक्यान कास्कीले संस्थागत सेवा र शैक्षिक परामर्श क्षेत्रलाई थप व्यवस्थित बनाउने लक्ष्य लिएको छ ।