फ्लाई दुबईले सन् २०२७ अक्टोबर ३० सम्मको बुकिङ खोल्यो, पोखराका पर्यटन व्यवसायी उत्साहित

पोखरा। पोखरा अन्तर्राष्ट्रिय विमानस्थलबाट सञ्चालन हुँदै आएको दुबई–पोखरा–दुबई उडानका लागि फ्लाई दुबईले सन् २०२७ अक्टोबर ३० सम्मको बुकिङ खुला गरेको छ। बुकिङ अवधि विस्तार भएसँगै पोखराका पर्यटन तथा व्यवसायीहरू उडानको निरन्तरताप्रति उत्साहित भएका छन्। यसअघि सीमित अवधिका लागि बुकिङ खुला गरेको फ्लाई दुबईले लामो अवधिसम्म टिकट बुकिङ गर्न सकिने व्यवस्था गरेको हो। फ्लाई नमस्ते ट्राभल्सका सञ्चालक पोमनारायण श्रेष्ठका अनुसार सुरुआती उडानमा उत्साहजनक प्रतिक्रिया प्राप्त भएपछि कम्पनीले बुकिङ अवधि बढाएको हो। चाडबाडको समय भएकाले दुबईबाट पोखरा आउने यात्रुको तुलनामा पोखराबाट दुबई जाने यात्रुको सङ्ख्या केही कम रहेको श्रेष्ठले बताए। चाडबाडपछि पोखराबाट दुबई जाने यात्रुको सङ्ख्या बढ्ने उनको अपेक्षा छ। पोखरा अन्तर्राष्ट्रिय विमानस्थलका सूचना अधिकारी विनोदसिंह रावतका अनुसार असोज ७ गतेयता प्रतिकूल मौसमका कारण फ्लाई दुबईको एउटा उडान रद्द भए पनि अन्य दिन उडान नियमित भइरहेको छ। फ्लाई दुबईको उडान तालिकाअनुसार जहाज हरेक दिन साँझ ६ः१५ बजे पोखरा अवतरण गर्ने र साँझ ७ः१५ बजे दुबईका लागि प्रस्थान गर्ने गरेको छ। सूचना अधिकारी रावतका अनुसार गत सोमबारसम्म फ्लाई दुबईमार्फत तीन हजार ११३ यात्रु दुबईबाट पोखरा आएका छन् भने पोखराबाट एक हजार ४२३ यात्रु दुबई प्रस्थान गरेका छन्।

फ्लाई दुबईले हाल १६५ यात्रु क्षमताको बोइङ ७३७ म्याक्स ८ जहाजमार्फत दुबई–पोखरा–दुबई उडान सञ्चालन गर्दै आएको छ। पोखरा अन्तर्राष्ट्रिय विमानस्थलबाट नियमित अन्तर्राष्ट्रिय उडान सुरु गर्ने यो पहिलो वायुसेवा कम्पनी हो। यसअघि केही वायुसेवा कम्पनीले पोखराबाट विभिन्न अन्तर्राष्ट्रिय गन्तव्यमा चार्टर उडान गरेका थिए। फ्लाई दुबईको उडान सुरु भएपछि दुबईलाई ट्रान्जिट बनाएर पोखरालाई विश्वका विभिन्न मुलुकसँग हवाई सञ्जालमार्फत जोड्न सहज भएको छ। यसले पोखराको पर्यटन प्रवर्द्धन तथा अन्तर्राष्ट्रिय आवागमनमा सहयोग पुग्ने अपेक्षा गरिएको छ। सन् २०२३ जनवरीमा सञ्चालनमा आएको पोखरा अन्तर्राष्ट्रिय विमानस्थलबाट लामो समयसम्म नियमित अन्तर्राष्ट्रिय उडान हुन सकेको थिएन। सरकारले चालु आर्थिक वर्षको नीति तथा कार्यक्रममा अन्तर्राष्ट्रिय वायुसेवा कम्पनीलाई आकर्षित गर्न कूटनीतिक पहल गर्ने उल्लेख गरेको केही समयपछि फ्लाई दुबईले उडान सुरु गरेको हो। दुबई–पोखरा–दुबई उडानका लागि नेपाल नागरिक उड्डयन प्राधिकरणले गत जेठ २५ गते फ्लाई दुबईलाई अनुमति दिएको थियो। अन्तर्राष्ट्रिय वायुसेवा कम्पनीलाई आकर्षित गर्ने उद्देश्यले सरकारले विमानस्थलका विभिन्न शुल्कमा छुटसमेत दिएको छ। वि.सं. २०८५ भदौ मसान्तसम्म पार्किङ, ल्यान्डिङ र नेभिगेसन शुल्क पूर्ण रूपमा छुट दिइएको छ भने ग्राउन्ड ह्यान्डलिङ शुल्कमा ५० प्रतिशत छुटको व्यवस्था गरिएको छ। बुकिङ अवधि विस्तारले उडानको दीर्घकालीन योजनाप्रति सकारात्मक सङ्केत गरे पनि उडानको वास्तविक निरन्तरता भने आगामी सञ्चालन र यात्रुको मागमा निर्भर रहनेछ।